(1968)
Жыпар Умарова жана анын чыгармачылыгы тууралуу
Акын Жыпар Умарова 1968-жылы Ноокат районунун Көк-Бел айылында туулган. 1994-жылы ОшПИнин филология факультетинин кыргыз тили жана адабияты бөлүмүн бүтүргөн. Эмгек жолун 1991-94-жылдары Аксы районунун «Ленинчил жаш» орто мектебинде мугалим болуп баштаган. Ош мамлекеттик университетинин кыргыз филологиясы факультетинде 10 жыл кабинет башчы болуп иштеген.
Ж.Умарованын ырлары студент кезинен баштап гезит-журналдарга жарыяланып келет. 2002-жылы «Саамалык – 3» жаштардын көркөм адабий чыгармаларынын жыйнагына ырлары чыккан. 2008-жылы жаштардын «Бүчүр» альманахына да ырлары жарыяланган. «Кызыма кырк нуска», «Сырдашуу» аттуу эки китептин автору.
Учурда Ош МУнун финансы-юридикалык колледжинин улук окутуучусу болуп эмгектенүүдө.
“Сырдашуу” китебинен
Китептери
Ырлары
САБАКТАН ЧЫККАН КОШ САПТАР
– Эх, сабак – 90 мүнөт өмүрүмсүң
Чарчаган же жайнаган көңүлүмсүң.
– Суроолуу 90 мүнөт көздөр карайт
Саат жылбайт. Коңгуроону көңүл самайт.
– Сабак – сен – ырыскы, кешигимсиң
Кечиксем да, сен ачык эшигимсиң.
– Ызы-чуу… балдар кээде чарчатат
үйгө келип, аларды ойлоп таң атат.
– Сабак өзү курал экен дем берүүчү
Балдар мага күн сайын текшерүүчү.
– Мейли окуба, окуучум сабагымды
Адам болгун, кенен таштап кадамыңды.
– Студенттен башка сени ким издесин?
90 мүнөт таажысыз бийликтесиң.
– Сабак-сахна, сабак-майрам чынында
Сабак ыйык, жашайт дайым ырымда
– Намазың каза болсо, кайра окуйсуң
Сабагың өтүлбөсө, не чочуйсуң?
– Ката сүйлөп, же баркыңды кемитсем
Кечир сабак, кечир сени кейитсем!
2013-жыл, февраль айы